A Orquestra Nova da Sinfónica de Galicia abriu en xaneiro de 2012 un ciclo que serve de escaparate público para amosar o importantísimo labor didáctico desenvolvido polas agrupacións orquestrais galegas de novos intérpretes, principalmente vencelladas á organización das súas irmáns maiores, a Sinfónica de Galicia e a Real Filharmonía de Galicia. Este ciclo ofrece a dobre oportunidade para o público de asistir a concertos de gran calidade e coñecer de primeira man o futuro profesional da música clásica en Galicia.