O proxecto expositivo da Concellaría de Cultura, desde o seu inicio, tivo dúas liñas de actuación: por unha banda a recuperación da historia da arte contemporánea galega a través de amplas retrospectivas de artistas recoñecidos e, por outra, a difusión da arte contemporánea española e internacional. A programación  expositiva inclúe monográficas e colectivas dedicadas a artistas galegos, españois e internacionais, tanto a través de producións alleas, colaboracións con coleccións públicas e privadas e producións propias. As salas municipais, coa Sala Isaac Díaz Pardo do Auditorio de Galicia como centro de referencia, acolleron mostras como as de Picasso, Miró, Tàpies, Saura, Lugrís, Granell, vangarda portuguesa, vangarda rusa, a pintura magrebí, arte precolombino, arte hindú, arte africano, arte árabe, Escola de Londres e un longo etcétera. Unha referencia estable da programación de exposicións é a convocatoria bianual do Premio para Novos Artistas do Auditorio de Galicia.